932(搞生意)> 

創業新聞 > 

坐月要識「按單執湯」谷奶茶網上熱賣五百包

坐月要識「按單執湯」谷奶茶網上熱賣五百包

發佈日期: 2016-10-24   資料來源: 壹週刊
「因我希望可以親手幫太太調養好身子,所以開始左煲湯。」廿四孝老公麥浩晃(Kenny)的一個窩心想法,最終發展成專售中式湯料包的自家店 -「煲湯」。

其除了在今年五月於土生土長的大埔大元邨街市開設地鋪與街坊嘻嘻哈哈打成一片外,更分身經營網店,設免費送貨及附送簡單清晰的煲湯貓紙給一眾網購客人,方便一眾繁忙都市人,現時月賺兩萬多。「煲湯」的一切除了是源於對懷孕太太的關愛,更是來至對母親多年來獨力經營涼茶店之尊重。
「我叫佢做太師傅,喺佢一手一腳教曉我。」身為獨子的Kenny真正希望的是,把伴隨自己長大的味道、及母親的保健概念以新一代的方法延續下去。


「太太一開始有左時我主力煲啲安心湯令佢能安睡、唔好太煩躁。到中後期會轉煲滋潤湯水比佢,等佢唔好太口乾。」

身為愛妻號的Kenny指現今孕婦的營養很足夠,不需過份大補,平補助她們平安地渡過就可以。

而他對太太的關心也沒因成功誕下兒子而鬆懈,相反一直按其坐月至餵哺母乳的情況改變「按單執湯」,指坐月時已可每天以「上奶代茶」配以炒米(可用白米、紅米、糙米、黑糯米)當水來喝,一百天後可按個人情況減少飲用次數。

「我好支持佢出售代茶,唔喺單為錢,而喺好多媽媽有苦說不出,有時更會出現塞奶發燒情況,好辛苦。」

Kenny太太Rachel堅定地說。目前以助媽媽增奶量的「上奶代茶」最為歡迎,月賣五百包。店鋪出售的湯包更多達四十八款,由只售廿二元的小兒開奶茶至一百六十五元的蛤蚧鱷魚肉湯也有,包含四季所需,主要為四人份量、煲起有八至十碗。


「起初見佢日日喺到不停玩電話,睇到我燥唔知佢搞緊乜,覺得佢浪費時間,但原來他喺處理緊網購客仔嘅單。」被尊稱為「太師傅」的Kenny媽媽掩著半邊嘴笑說。

訪問當天,Kenny媽媽也有身穿單車運動裝現身,現年已七十三歲的她,每天仍會踩單車、游泳,健康過一眾都市人。中氣十足的她笑言自己健康精神,就已是鋪頭最好的「生招牌」。

掌管涼茶大業多年的她,難免未能適應新一代的處事方式,但古老非守舊,了解過後的她對兒子充滿信心,問及對其成績是否滿意時,太師傅一如以往響亮地回應:「成績係一流!如果唔好我都唔會出黎啦。」

一句說話一抹笑容,已是Kenny得到過最好的成績表。


撰文:黃綺敏
攝錄:關永浩
 
932
COPYRIGHT 2016 932(搞生意) All rights reserved.